اسمي عُمر عبيد. معي رخصة بيرسونال ترينر، يعني مدرب بشهادة، ورخصة أخصائي تغيير سلوك، ورخصة بازعاج مرتي والاهم من هاد كله مهندس... (تنويه: حقولكم اني مهندس كمان ثلاث مرت) المهم يعني مو حافظ كلمتين عن التمرين وحارقهم ستوريات انستا.
اول مرة بحياتي دخلت نادي (مع اخوي الكبير عدي) عدي جراح تجميلي اكبر مني بخمس سنين. ما بعمل فيلر! بشيل عضلة من مكان و بشبكها بمكان ثاني، دكتور حقيقي فاهمين علي؟ ذكرت اسمه لاني دايما بتهاوش معه على سوالف عضل لانه مفكر انه بفهم اكثر مني لانه دكتور، بس انا كمان مهندس.
المهم بديت العب حديد لما كان عمري 15 سنة مع عدي اخوي و انا مو فارق عندي الشكل، كنت بدي اشي افرغ فيه ضغوطات الحياة، ازيد فيه من سكينتي الداخلية احارب فيه شياطيني و اكتشف فيه نفسي.
الكلام الي فوق كذب، مو كله.. بس اني العبت حديد "مو فارق عندي الشكل و تفريغ واحارب بطيخ" لانه هاد تحديدا كان هدفي.. عضل! كان بدي شكل حلو مثل عدي (الي اليوم بس اشوف صوره زمان بنفقع ضحك انا وياه) المهم مين ما بحب يكون شكله معضل! فهاد كان هدفي الوحيد. شكل حلو و بنقدر نقول قوة.
مافي لا شياطين ولا ضغوطات حياة كان عمري 15 سنة لسا بدري عهالكلام لكن...
اليوم بكتب هالكلام عمري انضرب ب 2 و صار 30، الي خلاني استمر الى هاي اللحظة اني فهمت انه العضل اشي تافه مقارنة بالي صار بعقلي و بشخصيتي. (هاد جد)
فالجيم أعطاني كل هاد فعلا... ومن يومها دخلت هالدوامة وغرقت بهالعالم لدرجة اشتري
كتب من باب التسلاي (انا الي ما بعمري اتخيلت اني اقرا كتاب مثل الاجانب) ووصلت
لمرحلة ما اعرف اخد اوف. (بغصب حالي لانه مهم للعضل، حاكي عن اهمية الراحة بالباكجات)
أنا مو المدرب اللي يرمي عليكم تمارين من كيسي و"يلا نبني عضل"، أنا فاهم كل عضلة بجسمك، حرفياً حافظ كل عضلة، من وين بتطلع وين بتشبك، ووظيفتها، كيف هيك؟ لاني ببساطة وقعت في غرام عالم الفتنس لليوم مو فاهم كيف وصلت هون.
شو بدكم بطولة السيرة، وقت ما الناس كانت عايشة على PUBG أيام كورونا، أنا شريت ثلاث كتب عن
الاناتومي (متابعين انستاغرام بعرفوا لاني قرفتهم معلومات و انا بقرا لاني كنت
منبهر باهمية الستريتشات الي ما عمري كنت اسويهم) و حفظت الستريتشات لكل العضلات و
انواعهم و كيف بحلوا الاصابات و دخلت عميق الف.. بتعرفوا ليش؟ لاني كنت زهقان
والله و كنت في قمة انبساطي. (كثير تغلبت و انا بكتب كلمة انبساط)
المهمممممم:
أنا دارس هندسة صناعية بالجامعة الأردنية.. عشان ما تضلكم تستنوا.. هيك ضايل مرة.
الموقع
هاد مو معمول عشان "يحمّسك".
هاد الموقع معمول تمر.. (اذا بتحب معمول بالجوز لو سمحت اطلع برا، الا اذا كنت
مهندس "مثلي" بنسويلك استثناء)
هيك صاروا ثلاث.
..
المهم:
شباب، صبايا، صغار، كبار، بيت، جيم، مبتدئ، مقلع... مزبطكم بهالموقع.
أنا متزوج. ومرتي ما بتتمرّن طبعا، لاني ما بدي ياها تصير معضلة مثل الشباب..
طبعا الحكي هاد غلط! و مرتي بتتمرن من زمان الف و اه صارت قوية، و اه جسمها حلو! و لا ما بنت عضل مثل ما البنات بخافوا كان انا ما رضيت! اكيد ما بدي اكون متزوج زلمة.. (حاكي عن الموضوع بباكيجات البنات)
الهندسة مو شهادة، الهندسة فكر.. يعني:
الخطط الموجودة هون مو عشوائية، خطط عن شهادات و كمية كتب كبيرة، صارلي 15 سنة بلم
بهالخبرة، دقيقة، بدها حد داخل يغير حياته، يقوى، يعمل الي غيره ما بعمله عشان
يتميز عنهم.
بدكم حكي
كيوت؟ روحوا اشربوا ماتشا. (ما جربتها ولا حجربها)
بدكم نتايج؟ شدوا براغيكم... و حي على التمرين.